Min Shaw kuier in Gister Se Grotes

In die boek 50 Stemme (Die grootste name in Afrikaanse musiek) skryf Ilza Roggeband dat Min Shaw op haar dag die grootste ster in Suid-Afrika was. “Met die een trefferplaat na die ander en rolle in van die gewildste Afrikaanse flieks ooit, was sy ‘n huishoudelike naam.” Daarom is dit veilig om te sê Min Shaw is baie meer as net Min die minnesangeres. Haar veelsydige loopbaan, spontaniteit en lewensblye uitkyk op die lewe maak vandag steeds van haar ‘n liefling onder aanhangers en haar lewe is gesaai met soveel hoogtepunte dat sy dit in ‘n boek van haar eie kon vaslê.
Ons het vinnig by haar ingepop, waar sy haar boek Sprokie van ‘n Liefling deur Shaun Andrew Mynhardt by die Hollywood Klein Teater in Krugersdorp vrygestel het.