Gister Se Grotes Huldeblyk aan Irene van Wyk

Irene van Wyk was aanvanklik bekend as die meisie wat saam met Steve Hofmeyr sing, maar het later weggebreek van hierdie titel toe sy haar eie unieke stempel op musiek begin afdruk. Alhoewel haar stem mense aan Tina Turner herinner, het sy met haar eiesoortige styl, veelsydigheid en sonderlinge vokale vermoëns haar merk gemaak, volgens Danie C. Pretorius se boek “Musieksterre”.

Haar musiekstyl strek oor ‘n mengsel van loslyf-rock, stemmige ballades en soms selfs ‘n tikkie jazz. Volgens haar mede-kunstenaars was sy altyd professioneel, maak nie saak waar sy opgetree het nie. Sy vertolk elke liedjie met emosie, deernis en energie en alhoewel sy nie meer vandag met ons is nie, fokus ons vandag op haar musiek en loopbaan.