Putin speel met Trump - kenner

Die ontmoeting van Amerikaanse president Donald Trump en Rusland se Vladimir Putin volgende week in Hongarye is van die tafel af. 'n Withuis-amptenaar sê daar is geen planne vir 'n ontmoeting in die nabye toekoms nie. 'n Voorbereidende vergadering tussen die Amerikaanse buitelandse sake-minister Marco Rubio en sy Russiese eweknie Sergei Lavrov sou hierdie week plaasgevind het, maar die Withuis sê die twee het 'n "produktiewe" telefoonoproep gehad en 'n vergadering is nie meer nodig nie. Die Withuis het nie verder kommentaar gelewer nie. Simon McDonald, die voormalige hoof van die Britse diplomatieke diens, het aan LBC-televisie se Andrew Marr gesê hy dink Putin het Trump aan die neus gelei.